Ymgyrchu yng Nghymru

Gosod arthritis ar yr agenda yng Nghymru 

Mae ein hymgyrchu wedi arwain at newid gwirioneddol i bobl gydag arthritis yng Nghymru. 

Mae llwyddiannau ein hymgyrchoedd diweddar yn cynnwys: 

• Yn dilyn ein hymgyrch ar y cyd â NRAS a BSR, mae gwasanaeth rhewmatoleg bediatrig aml-gynghorydd ac aml-broffesiwn newydd i blant ag arthritis wedi cael ei sefydlu yn Ysbyty Arch Noa i Blant Cymru. Mae’r clinig yn cynnal clinigau ymweliadau mewn llawer o rannau o Gymru. Cyn i’r gwasanaeth newydd gael ei sefydlu, roedd llawer o blant ag arthritis o dde Cymru yn teithio cannoedd o filltiroedd i gael mynediad at wasanaethau arbenigol yn Lloegr.
•  Roedd ein Maniffesto 2021 yn cynnwys galwad am rôl Arweinydd Clinigol Cyhyrysgerbydol Cenedlaethol newydd (sydd bellach yn arwain Rhwydwaith Clinigol Strategol Cenedlaethol ar gyfer Iechyd Cyhyrysgerbydol), Fframwaith Cyhyrysgerbydol Cenedlaethol, polisi cenedlaethol 'Aros yn Dda' a strategaeth orthopedig cenedlaethol… cafodd pob un ei ddatblygu ac maent bellach yn gyrru gwelliannau i’r gwasanaeth.  
• Ysgrifennodd dros 3,000 o’n cefnogwyr yng Nghymru at eu Haelodau Seneddol lleol yn 2025 i ymgyrchu yn erbyn y newidiadau arfaethedig i Daliadau Annibyniaeth Personol (PIP).  

Os edrychwn yn ôl ymhellach, fe wnaethom arwain yr ymgyrch i ymestyn presgripsiynau am ddim i bawb sy'n byw gydag arthritis yng Nghymru. Bu i Lywodraeth Cymru ar y pryd benderfynu rhoi'r gorau i godi am bresgripsiynau yng Nghymru o ganlyniad 

Er gwaetha’r newidiadau hyn, mae llawer i’w wneud o hyd i godi ymwybyddiaeth o effaith arthritis ar unigolion ac ar gymdeithas, i wella gwasanaethau gofal iechyd i bobl ag arthritis ac i roi arthritis yn flaenoriaeth gofal iechyd sy’n cyd-fynd â’i effaith.  

Ymgyrchwyr – cymerwch ran! 

Mae gennym gymuned weithredol o ymgyrchwyr sy’n angerddol am wneud gwahaniaeth i bawb sy’n byw gydag arthritis yng Nghymru. Mae llawer o ffyrdd o gymryd rhan: 

• Rhannwch eich stori gyda Arthritis UK.  
• Dilynwch ein cyfrifon ar Facebook a X i gael yr wybodaeth ddiweddaraf am ein hymgyrchoedd. 
• Mae ein Gwirfoddolwyr Gwneud Gwahaniaeth yn datblygu ein blaenoriaethau ymgyrchu, ein cynlluniau gweithredu ac maent yn ymgysylltu â’u gwneuthurwyr penderfyniadau lleol. E-bostiwch ni yn cymru@arthritis-uk.org  i ofyn am ddisgrifiad rôl. 
• Ymunwch â’n cymuned Arthritis UK ledled y DU a derbyn e-ddiweddariadau rheolaidd, gan gynnwys manylion am ein hymgyrchoedd e-weithredu.   
• Os hoffech chi roi gwybod i ni am fater yn eich ardal y dylen ni fod yn ymgyrchu drosto, e-bostiwch ni: cymru@arthritis-uk.org .

Gwybodaeth ar gyfer Aelodau o’r Senedd, Aelodau Seneddol, Cynghorwyr a gwneuthurwyr penderfyniadau eraill 

Wrth i 974,000 o bobl fyw gydag arthritis a chyflyrau cyhyrysgerbydol yng Nghymru, rydym yn gwybod bod llawer ohonoch chi wedi profi’r effaith enfawr y gall arthritis ei chael ar ansawdd bywyd yn bersonol neu drwy aelod o’ch teulu neu’ch ffrindiau. 

Mae angen eich cymorth arnom i sicrhau bod anghenion pobl sy’n byw gydag arthritis yn cael eu clywed yn glir yn y Senedd, yn San Steffan, yn ein cynghorau lleol ac yn ein Byrddau Iechyd. 

Mae ein Tîm Polisi a Materion Cyhoeddus yng Nghymru yma i roi gwybodaeth a’r ymchwil ddiweddaraf i chi ar faterion polisi. E-bostiwch ni yn cymru@arthritis-uk.org  i drafod materion polisi, ein hymgyrchoedd neu faterion eraill sy’n effeithio ar bobl gydag arthritis yn eich ardal. 

Rydym yn rhoi e-ddiweddariadau ar amseroedd aros orthopedig i bob Aelod o’r Senedd bob mis, os hoffech chi gael eich cynnwys ar ein rhestr ddosbarthu, e-bostiwch h.evans@arthritis-uk.org .  

Mae ein gwasanaethau cymorth ar gael i’ch etholwyr. A wnewch chi gyfeirio etholwyr perthnasol i’n llinell gymorth - 0800 5200 520. Bydd tîm ein llinell gymorth yn rhoi gwybodaeth sydd wedi’i theilwra ar gyfer yr unigolyn gan gynnwys manylion am ein gwasanaethau lleol. Mae gennym 30 o grwpiau cymorth lleol yng Nghymru. 

Adnoddau ar gyfer gwneuthurwyr penderfyniadau 

Arthritis UK Cymru: Maniffesto Etholiad y Senedd 2021   
Arthritis UK Cymru: Pecyn Croeso Aelodau o’r Senedd 2021   
Arthritis UK: Cyflwr Iechyd Cyhyrysgerbydol 2025 (Dogfen ar gyfer ledled y DU)  
Perfformiad a Gwella GIG Cymru: Rhwydwaith Clinigol Strategol Cenedlaethol ar gyfer Iechyd Cyhyrysgerbydol   
GIG Cymru: Fframwaith Cenedlaethol Cyhyrysgerbydol 2024-2029  
GIG Cymru: Datganiad Ansawdd Cenedlaethol Cyhyrysgerbydol 2024  
Addysg a Gwella Iechyd GIG Cymru: Fframwaith gallu cyhyrysgerbydol aml-broffesiynol Cymru  
Y Strategaeth Glinigol Genedlaethol ar gyfer Gwasanaethau Orthopedig: Glasbrint Cenedlaethol ar gyfer Cyflenwi Llawfeddygaeth Orthopedig yng Nghymru 2022 ac adroddiadau dilynol

Ymgyrchoedd cyfredol Arthritis UK Cymru 

Maniffesto Etholiad y Senedd 2026 [Dolen ar gael cyn hir] 

Bydd ein Maniffesto Etholiad y Senedd 2026 yn cael ei gyhoeddi ym mis Chwefror 2026 a chaiff ei ddosbarthu i bob ymgeisydd o bob un o’r prif bleidiau cyn yr etholiad. Rydym yn awyddus i rannu ein syniadau polisi a’n galwadau gyda gwneuthurwyr penderfyniadau wrth i ni ddatblygu ein maniffesto. Os hoffech chi drafod ein maniffesto gyda ni, e-bostiwch h.evans@arthritis-uk.org . 

Gostwng amseroedd aros ar gyfer llawfeddygaeth orthopedig 

Mae amseroedd aros ar gyfer llawfeddygaeth orthopedig yn parhau i fod yn llawer rhy hir wrth i degau o filoedd o bobl aros dros flwyddyn am driniaeth mewn poen difrifol a phoen sy’n gwaethygu. Mae llawer yn colli eu symudedd, eu hannibyniaeth a’u gallu i weithio wrth iddynt aros am driniaeth. Mae targedau amseroedd aros niferus heb eu cyrraedd gan Lywodraeth Cymru. 

I ostwng amseroedd aros, rydym yn galw am gynllun gweithredu orthopedig cenedlaethol newydd i adnabod y gweithlu a’r cyfleusterau angenrheidiol i ddiwallu’r galw presennol a’r galw a ragwelir trwy rwydwaith ehangach o hybiau llawfeddygol lleol a rhanbarthol.  

Gwella gwasanaethau gofal iechyd arthritis  

Mae cyflyrau Cyhyrysgerbydol ymhlith yr achos mwyaf o boen parhaus, anabledd a cholli diwrnodau gwaith. Mae cyffredinolrwydd ac effaith cyflyrau cyhyrysgerbydol ar y GIG a’r economi yn enfawr a rhagwelir y bydd hyn yn cynyddu. Mae angen i Lywodraeth Cymru flaenoriaethu polisi iechyd cyhyrysgerbydol a gweithio i leihau effaith arthritis ar y genhedlaeth bresennol a chenedlaethau’r dyfodol. 

Rydym yn gweithio i gefnogi’r Rhwydwaith Strategaeth Clinigol Cyhyrysgerbydol newydd i ddatblygu llwybrau gofal a manyleb gwasanaeth i yrru safonau gofal iechyd ar draws Cymru. Mae angen i’r Fframwaith Cyhyrysgerbydol Cenedlaethol, Datganiad Ansawdd Cyhyrysgerbydol a’r Fframwaith Gallu Cyhyrysgerbydol Aml-broffesiynol gael eu gweithredu’n llawn ar draws Cymru.